БНСУ-ын Сөүл хотын Ёндынпу дүүргийн төлөөлөгчид Баянгол дүүрэгт ажиллаж, хамтын ажиллагааны санамж бичиг байгууллаа

Бүгд Найрамдах Солонгос Улсын Сөүл хотын Ёндынпу дүүргийн Иргэдийн Төлөөлөгчдийн Хурлын Төлөөлөгчид 2026 оны зургаадугаар сарын 22-23-ны өдрүүдэд Баянгол дүүргийн Иргэдийн Төлөөлөгчдийн Хурлын үйл ажиллагаатай танилцаж, хоёр талын хамтын ажиллагааг өргөжүүлэх зорилгоор албан уулзалтууд зохион байгууллаа.

Айлчлалын хүрээнд талууд цаашдын хамтын ажиллагааны чиглэл, зорилтыг тодорхойлсон санамж бичигт гарын үсэг зурж, орон нутгийн удирдлагын байгууллагуудын сайн туршлага, үйл ажиллагааны талаар харилцан мэдээлэл солилцов. Түүнчлэн хүүхэд багачуудын сурч боловсрох орчныг сайжруулах, боловсролын хүртээмжийг нэмэгдүүлэх, суралцах боломж нөхцөлийг дэмжих чиглэлээр хамтран ажиллах асуудалд онцгой анхаарал хандуулж, тодорхой санал санаачилгуудыг хэлэлцлээ.

Мөн орон нутгийн өөрөө удирдах байгууллагын үйл ажиллагаа, төлөөллийн байгууллагын чадавх, иргэдийн оролцоог нэмэгдүүлэх арга замын талаар туршлага солилцож, харилцан ойлголцлыг бэхжүүлсэн үр дүнтэй уулзалтууд болж өнгөрөв.

Ёндынпу дүүрэг нь 380 мянга орчим хүн амтай бөгөөд дүүргийн Засаг даргын Тамгын газар 1500 төрийн албан хаагчтайгаар үйл ажиллагаа явуулдаг. Харин тус дүүргийн Иргэдийн төлөөлөгчдийн хурал нь 17 төлөөлөгч, 41 албан хаагчийн бүрэлдэхүүнтэй ажиллаж байна.

Ёндынпу дүүргийн Иргэдийн Төлөөлөгчдийн Хурлын дарга Жон Сон Хи болон Төлөөгчдийн хамтаар Баянгол дүүргийн хороодын үйл ажиллагаа, нутаг дэвсгэрт үйл ажиллагаа явуулж буй сургууль, цэцэрлэгүүдийн орчин нөхцөл, үйлчилгээний чанар, хүртээмжтэй танилцаж, цаашдын хамтын ажиллагааны бодит чиглэлүүдийг тодорхойлов.

Энэхүү айлчлал нь хоёр орны орон нутгийн удирдлагын байгууллагуудын хамтын ажиллагааг шинэ шатанд гаргахын зэрэгцээ боловсрол, хүүхэд хамгаалал, иргэдийн оролцоо, сайн засаглалын чиглэлээр харилцан туршлага солилцох боломжийг өргөжүүлсэн чухал үйл явдал боллоо.